ಸ್ವಾತಂತ್ರ್ಯ ದಿನ

                              ಕುಣಿಯೋಣ ಸ್ವಾತಂತ್ರ್ಯದ ದಿನವು ಬಂತು,

                              ಭಾರತಕೆ ನವಜನ್ಮ ಬಂದ ದಿನವೆಂದು..

                              ಸ್ವಾತಂತ್ರ್ಯಗೀತೆಗಳ ಹಾಡೋಣ ಇಂಪು,

                              ಬೀರೋಣ ದೇಶದಿತಿಹಾಸದ ಕಂಪು...||

                              ಬೀಸಿ ವ್ಯಾಪಾರ ವ್ಯವಹಾರದ ಜಾಲ,

                              ಭಾರತದಿ ನೂರಾರು ವರ್ಷಗಳ ಕಾಲ,

                              ಆಳಿದರು ಪರದೇಶದವರೆಮ್ಮಯ ನೆಲ,

                              ಹಾಳುಗೆಡುವುತ ನಮ್ಮ ಸಂಸ್ಕೃತಿಯ ಮೂಲ...||

                              ಆಂಗ್ಲರ ದುರಾಡಳಿತ ದೌರ್ಜನ್ಯವುಂಡು,

                              ಬಸವಳಿದ ಜನರ ಬಿಸಿಕಣ್ಣೀರ ಕಂಡು 

                              ಬಂಡೆದ್ದಿತು ಯುವಕ-ಯುವತಿಯರ ದಂಡು,

                              ಕಂಡಲ್ಲಿ, ಆಂಗ್ಲರಿಗೆ ಹೊಡೆದರು ಗುಂಡು...||

                              ಸಾವಿರ ಹುತಾತ್ಮರ ರುಧಿರಾಭಿಷೇಕ 

                              ಕೆಳಗಿಳಿಯಿತು ಸೋತು, ಆಂಗ್ಲರ ಪತಾಕ.

                              ದಾಸ್ಯವನು ಕಳಚಿ, ಪಡೆದಳು ಮುಕ್ತಿ,

                              ಸ್ವಾತಂತ್ರ್ಯದ ನಗೆಯ ಬೀರಿದಳು ಭಾರತಿ...||

                              ಶ್ರಮವಹಿಸಿ ಹಿರಿಯರು ತಂದಿಹ ಸ್ವತಂತ್ರ 

                              ಉಳಿಸದಿರೆ ಆದೇವು, ಮತ್ತೆ ಪರತಂತ್ರ 

                              ಸ್ವಾತಂತ್ರ್ಯರಕ್ಷೆಯಾಗಲಿ ನಮ್ಮ ಮಂತ್ರ 

                              ಸಂಘಟಿಸುವ ಬನ್ನಿ, ಮತ್ತೆ ಜನತಂತ್ರ...||